DIXXERNIMENT

Tagħraf il-lejl jiċkien u mbagħad jespandi

bil-lajma griża ‘nkrepattiva tiegħu.

Il-lejl bħal orgni

mehdi jilmenta dwar ħajjiet moħlija.

Tagħraf kemm qraset l-illużjoni.

Kemm saru jixbħu l-imħabbiet ta’ darba

ġwienaħ bla lewn grunċjati

li nsew ghħl kollox kif itiru.

Jew saret tixbaħ il-passjoni katalett tal-pesta.

Il-qalb imgħallqa b’piena sfiqa.

Il-qalb eżawsta donnha ftila mxarrba

fl-għadira fonda tat-telfien.

Fuq il-ħitan tal-ġranet tiegħek

jew dawk li baqa’ minnhom

hemm dbabar kbar tal-moffa

jiskuraw jintnu b’gangrena.

Ix-xita tiġma’ ċ-ċfales mal-bankini.

U ma’ sigħet l-erwieħ

iċ-ċinju jkanta bil-presentiment

bil-ħoss tal-lejl maqbud fi grieżmu.

Għarkubbtejh il-lejl jirrepeti lilu nnifsu

bħal patri mkeffen bil-barnuża b’kollox.

Min jaf fejn mar l-alwett fejn marru n-nisa

li lagħbu karusell b’xewqatek

li żifnu mat-tastiera

ta’ ġismek u rġulitek

idubu fir-ritwali kollhom żina.

Sakemm rawk hemm għarwien u moħli

bħal skjav sturdut f’ħoġor l-isfinġa

b’leħen qarrieq ta’ qaħba ssofflok ruħek.

Baqagħlek għażla waħda:

titħaxken taħt id-dbielet ta’vrus jogħtru w jinġazzaw

f’deklin inevitabbli

jew tmur

iddur it-toroq fgati tiddikkjara

l-irrelevanza tiegħek

f’mixja farseska tnissel biss żufjett.

Mario Azzopardi - Novembru 2011