ĠESU’ ĦDEJN L-ISTAZZJON TAL-PETROL

Apparizzjoni fil-korsa ta’ kruċjata kontra d-divorzju fi gżira teosofika

Ma nafx nispjega kif. Intuwizzjoni poetika. Imma kont ċert li kien hu.

Fejn l-istazzjon tal-petrol, taħt kartellun kbir b’wiċċ tifel imbażża’ jgħatti wiċċu, kien hemm Ġesu’ Kristu. Ma kien jixbaħ xejn lis-santi romantiċizzati li nħarġu waqt il-kruċjata tal-militanti spirati mill-qodos.

Imma kellu wiċċ semitiku: skur, issingjat bil-qdumija u l-marki ta’ xi flaġell antik għadu jidher fuq xbinu w taħt għajnejh. Xagħru tqil iswed jasal sal-kozz t’għonqu, b’nokkli rqaq deħlin f‘xulxin u mgħakkrin.

- Ma qrajna xejn dwarek, dan min fejn inqlajt, Ġesu Kristu? Din xi emerġenza, xi strateġija ta’ fidwa? Ġejt tipplakalna l-kuxjenza nazzjonali? Ħalli nkun dirett: int kontra d-divorzju, Ġesu’ Kristu? azzardajt nistaqsi.

Ma weġibnix imma bis-sandli beda jħarbex xi ħaġa fit-trab ta’ Mejju, hemm biswit l-istazzjon.

Ma stajtx nagħraf il-kitba. U ma kontx naf kinetx bl-Aramajk, bil-lingwa ta’ Sidrak u Mesak jew b’xi Malti ossolit li ntesa.

Fil-pront jinstemgħu il-ġwienaħ ta’ qtajja’ tjur, bejn wiċċhom t’arkanġli makakki, bejn irtukkati bħall-artisti tal-kabare’, bejn donnhom lebsin maskri tal-ossiġnu, bejn donnhom b’wiċċ nisa mingħajr sess viżibbli, li sabu vokazzjoni tardiva favur il-kastita’ u bejn donnhom eżaltati, ta’ kontra d-dnub. Daru fuq ras Ġesu’, forsi tliet metri ‘l fuq, u kantaw xi ħaġa bil-ħanqa taż-żrinġijiet fil-kummiedji tal-amfiteatru, li deher li qed jifhem u ma jifhimx, u li nbelgħet mill-ħsejjes tat-traffiku. Itiru magħhom kien hemm ostji bħal dawk li dan l-aħħar bdew jitfaċċaw mix-xejn fuq l-Għolja tal-Maġija, lejn is-sud tal-gżira, u fl-ajru bdew jiktbu sinjali b’kalligrafija mħawda. Bdew jiktbu bix-xewk, bħal dak li dan l-aħħar ukoll, beda jitfaċċa ħiereġ mis-saqaf tal-ħalq tal-bużullotist mirakoluż ta’ fuq l-Għolja. Imbagħad dawk il-ħlejjaq taru ‘l fuq u sparixxew, iħallu warajhom żajbriet u rix imnittef, jitbandal fl-umdita’.

- Dawk min kienu, Ġesu’ Kristu? Erġajt jien. Dawk mill-armata tiegħek, jewilla?

L-istess, tweġiba xejn. Did-darba lanqas kitba fit-trab. Imma deher skomdu dak l-għarib, donnu qed jipprova jirrikonċilja ruħu mas-sinjali taż-żmien. Jew jaħseb f’xi spegazzjoni għad-dehra tiegħu hemm, fit-triq traffikuża, mal-ġenb tal-pompa tal-petrol u taħt il-kartellun kontra t-tiċrit matrimonjali kattoliku.

Ma nafx x’kont qed nistenna hemm, inħares lejn dak ir-raġel vag, liebes qmis bajda mdennsa, kafija m’għonqu, jeans imraqqa’, qorq mingħajr għarqub u l-ħarsa samra ta’ profeta insensat u barra minn żmienu.

Ma nafx kienx jaf bid-dettalji kollha tal-pestilenza morali li ħatfet lill-poplu. Jew kienx jaf kemm kienet qed ixxerred dmugħ ommu, l-Verġni Marija. Ma nafx kienx konxju minn xi gidma ta’ lupu-nagħġa li sata’ kien hemm lesta għalih jew satax ikun attakkat minn qatgħa briganti malli jidħol il-lejl.

Ma nafx kienx se jiftaħ il-qmis u jurini qalbu mdawra bix-xewk u tħaġġeġ, kif ipinġuh fis-santi.

- Int mix-Xammaj? Mal-Esseni? staqsejtu. Stednuk fuq it-televiżjoni jaqaw? U mnejn wasalt, Ġesu’ Kristu? Ħallaslek il-Vatikan jew ħallsitlek l-Arċidjoċesi? Jew il-Gvern demokristjan? U għadek tagħmel seħer? Min huma l-alleati tiegħek? Kif se tivvota? Taf xi problemi morali nħolqu f’dal-pajjiż tad-domni, niċeċ, slaleb, kampnari, murtali u politiċi fi kriżi?

Imbagħad qisni bdejt inxommlu riħa ta’ nbid u ħobż qares. U demm niexef. U rieħa ta’ talb bigott li weħel miegħu mill-antik, bla ma kien jaf kif, bla ma ried. Rieħa ta’ sinagoga, rieħa ta’ saċerdoti u papiet korrotti, rieħa ta’ pedofili reliġjużi u rieħa ta’ preċetti kattoliċi, li xi ħadd dendillu m’għonqu meta niżżluh mill-forka. U issa reġa’ rxoxta, b’laħmu w xaħmu, biswit l-istazzjon tal-petrol u taħt il-kartellun li mmuntaw dawk tal-kruċjata.

B’dak l-ilbies żdingat lanqas l-Inkwiżitur il-Kbir ta’ Gaulos ma kien se jagħrfu mill-ewwel, imma l-kelma kienet se tiġri żgur. U l-Qassis il-Kbir ta’ Gaulos kien se jwissih, bla dubju, biex ma jindaħalx fil-kwistjonijiet reliġjo-nazzjonali. Iwissih biex ma jindaħalx fil-biċċa, għax il-Kodiċi Kurjali ndrat bl-ammnet mill-fidili.

Kont se navża lil dak l-istramb, dak l-immigrant klandestin biex idabbar rasu. Imma ridt naf aktar.

- Smajt xi ħaġa bit-teosofija pnewmatika li teżisti f’dil-gżira ta’ San Pawl, Ġesu’ Kristu? Naturalment, naħseb li smajt għax int taf b’kollox. Jew se tagħmel tabirruħek li ma smajtx? Hawn kulħadd jippompja lil Alla, mill-Arċisqof sas-sorijiet tal-klawsura, mill-ministri sal-predikaturi fil-midja. Aħna speċjalisti t’Alla. Nafuh u nifhmuh aktar milli jaf u jifhem lilu nnifsu. Teosofi singulari aħna. U għandna relazzjoni intima anki mal-Iben Etern. Anki bil-ġenitali t’Ommu jħallina nidgħu.

Ġesu’ Kristu baqa’ ma jgħid xejn. U bilkemm iħares lejja. Kellu għajnejh jagħtu fil-bogħod, donnu qed jistenna l-qtajja’ tat-tjur anġeliċi terġa’ lura bil-kant żrinġi. Jew jistenna li jasal il-gang tas-suldati biex jerġgħu jsallbuh u jgħolluh għall-adorazzjoni tal-folla. Għal min jaf kemm-il darba.

Baqa’ hemm: bħal skultura tax-xemgħa ddub bis-sħana tal-eksost tal-karozzi.

Bħal eżiljat minnu nnifsu.

Divorzjat skomdu, maqtugħ min-narrattiva vera tiegħu.

- Se ngħaddi ‘l hinn, Ġesu’ Kristu. Il-lejla nara jirrappurtawx xi ħaġa dwarek fuq l-aħbarijiet.

Mario Azzopardi

Mejju 2011