IS-SEJĦA

X’wassalni s’hawn ma nafx.

Saqajja mhux saqajja.

Għajnejja mhumiex għajnejja.

Lanqas nifsi mhu tiegħi.

Fil-passaġġi niedja ta’ bejn l-oqbra mxejt.

Nitħaxken miegħi innifsi

b’dawl bati biss ħiereġ mix-xquq ta’ qalbi

jurini l-ismijiet u d-dati taħthom

imħaffrin fl-irħam skur tal-lap’di.

U ismi qiegħed hemm ukoll.

Kif azzardajt nitkixxef.

Leħni mirdum mal-għadam u l-insetti

isejjaħ lili.

Mario Azzopardi

L-Għid tal-Mejtin, 2011