POSTA LIL CONSTANCIA CASTENADA

2 ta’ Novembru 2010

Għażiża Constancia

Ħadt gost ħafna nisma’ mingħandek wara daż-żmien kollu.

Ma kontx naf li m’għadekx taħdem fl-Ambaxxata Brażiljana f’Bucharest. Nittama li l-pożizzjoni ġdida tiegħek fid-Dipartiment tar-Riċerka Estetika tagħtik is-sodisfazzjon li qed tistenna.

Nirringrazzjak taż-żewġ kapitli li bgħattli dwar it-teżi li bdejt dwar Breughel. Niftakrek li dejjem kont affaxxinata bil-battalja allegorika bejn il-Karnival u r-Randan kif espressa minn dak l-artist tal-burlesk. Niftakar li meta żorna flimkien ir-Rijkmuseum t’Amsterdam (insejt liema kienet is-sena) konna ddiskutejna fit-tul kwadru anonimu “anti-kattoliku” u kif fi żmien il-Kontro-Riforma, diversi artisti kienu jaraw il-ħajja tan-Nisrani bħala gwerra bejn ir-Raġuni Divina u x-xenqat ta’ żina fil-Bniedem.

Kif insib mument żmien, inwegħdek li naqra bl-attenzjoni kollha l-kapitli tiegħek u nibgħatlek xi kummenti. B’kumbinazzjoni, dan l-aħħar jien ukoll ktibt xi ħaġa dwar il-Karnival u l-preżenza ta’ Satana waqt il-festi orgjastiċi lejn tmiem il-Medju Evu. Iżda dwar dan forsi niktiblek meta nkun qlibt it-test f’lingwa li tista’ tifhimha int ukoll (il-limiti lingwistiċi nativi tiegħi inħosshom frustranti).

Intant, se naqleb fuq xi ħaġa oħra.

Xtaqt ngħidlek b’okkorrenza li sibt ruħi fiha xi għaxart ijiem ilu u li għadni qed nipprova nsibilha tifsira raġunata. Forsi tista’ tgħini nħoll xi ftit il-misteru bizzarr tagħha. Ma nafx għadekx interessata fil-letteratura psikika. Niftakrek taqra anki l-Eżerċizzji tad-Divinazzjoni ta’ Hermann Baptiste Sorayan.

Lejn nofs ix-xahar t’Awwissu, fl-eqqel tas-sajf, stedint għat-te lil dil-mara xwejħa iżda fuq tagħha, Marianna, fl-appartment tiegħi fi Triq Tas-Sliema. Wara li tkellimna fuq diversi suġġetti ta’ mingħajr importanza qaltli li għandi wisq trab fl-appartament, u li l-għada kienet ġejja tfarfarli l-kotba, għax taf li minħabba l-istat t’għajnejja, it-trab kien se jqabbadni xi infezzjoni. Għidtilha li mhux se nħalli lilha tfarfar il-kotba mit-trab oħxon u antik li nġema’ tul tant żmien, imma hi nsistiet.

L-għada mort għaliha bil-karozza u kif wasalna fl-appartament, libset xi ħaġa iffjurita li ġabet magħha, bla kmiem, rabtet maktur ma’ rasha u tatha għax-xogħol. Farfet is-salott u l-għamara tal-kuritur (fejn jekk tiftakar, għandi xkaffi twal bl-enċiklopediji) u mbagħad waslet għall-istudju. U bdiet biex tfarfar il-kotba li għandi quddiem l-iskrivanija.

Ħin bla waqt, minn wara l-volumi, ittir wirdiena kbira għal fuq dirgħajha tax-xellug. Naf li normalment titwerwer jew iħossha ħazin jekk imqar tara wirdiena mill-bogħod, imma did-darba żammet kalma u talbitni nġibilha l-insettiċida. Ġibtilha bott twil aħdar, manifattura Taljana, Formula Plus, b’wirdiena kbira f’nofs ċirku abjad għall-mira (azione rapida - lunga persistenza - elimina scarafaggi) u bdiet tisprejja fuq l-insett ripulsiv li spiċċa fuq dirgħajha tax-xellug. Il-wirdiena nqalbet wiċċha ‘l fuq, tagħti b’saqajha u b’ħarsa terribbli f’għajnejha. Waqgħet eżatt quddiem il-Poeżiji ta’ Catullus, il-maħbub ta’ Clodia, li kien jindirizzaha bħala Lesbia.

Marianna baqgħet tisprejja bil-goff (il-Formula Plus jelimina anki l-bajd tal-wirdien).

Imbagħad minn wara l-kotba toħroġ wiżgħa bil-wieqfa, lewn ir-ramm maħmuġ: kellha sider ta’ mara u żaqqha kważi trasparenti. Bdiet tiżfen bħal miġnuna fuq saqajha ta’ wara. Imbagħad ħarset lejna u mietet. Joħorġu aktar wiżgħat. L-istess. Kollha nisa (indeċenti u repunjanti fl-istess ħin). Marianna tkompli tisprejja u l-kamra timtala’ b’foga ‘mpossibbli. Il-wiżgħat joħolqu korejografija madwar il-wirdiena mejta, wiċċha ‘l fuq, issa mwebbsa fit-traxxendenza tagħha. Imma d-dramm kien għadu mhux komplut. Minn wara ktieb oħxon (The Hite Report on Love, Passion and Emotional Violence, 1987) toħroġ fekruna bla dahar u mbagħad joħroġ annimal stramb, abjad maħmuġ, bi dbabar kannella mitfijin, bejn fenek tal-Indi u ġurdien.

Marianna tkompli tiskarga l-velenu mill-bott. Issa wiċċha m’għadux jidher, moħbi fil-foga.

Idoqq it-telfown ta’ kuq l-iskrivanija. Ħabib tiegħi, b’leħen irqiq, jistaqsini nafx kif ineħħi tebgħa tal-granita tal-frawli.

- Mhux issa. Miegħi għandi mara anzjana qed toqtol il-wirdien u ħlejjaq insidjuzi u koroh.

- Aktarx li l-frawli kien immuffat.

- Mhux issa. Għandi l-kamra mimlija sprej.

- Kemm tagħtini r-riċetta kontra t-tebgħa.

- Qed nifga bl-insettiċida.

- Fottejt qmis għadni nixtriha. Kif se nneħħi t-tebgħa?

- Mhux issa. Issa mhux ħin.

- Kemm se ddum biex tgħidli?

Naqtagħlu t-telefown.

Il-bott tal-insettiċida ma jrid jinħela b’xejn. Il-mejtin jiżdiedu. Marianna m’għadx għandha fattizzi. Lanqas wiċċ.

Issa l-kotba mxarrbin għasra bil-velenu likwidu. Il-kliem u l-kapitli jibdew idubu u jqattru mill-ixkafef: sentenzi mill-biografija ta’ Sade, versi minn Rimbaud, strofi ta’ San Ġwann tas-Salib, aforiżmi ta’ Schopenhauer, grafika minn dizzjunarju tal-Armageddon, dati mill-ġrajja ta’ dinjiet mitlufin.

Se nieqaf hawn, għażiża Constancia. U nieħu gost jekk jogħġbok tibgħatli xi forma ta’ interpretazzjoni dwar ix-xenarju li ddeksrivejtlek.

Iżda qabel nagħlaq forsi jmissni ngħidlek li Marianna Immacolata Concetta (dak hu isimha sħiħ) tiġi ommi. Jekk m’inix sejjer żball ilha mejta aktar minn tliet snin u seba’ xhur u qabel għaddiet għad-dinja tal-vagezza kienet rikoverata fl-Istitut ta’ Casal Cospicua. Mill-familja jien kont l-aħħar wieħed li rajtha ħajja. Jumejn qabel mietet kienet waqgħet mis-sodda: ġiet għal wiċċha u benġlet id-dawriet t’għajnejha, ġbinha u geddumha. Qabel difnuha kont irtukkajtha biex nirkupralha xi ftit id-dinjita’.

Bl-isbaħ xewqat mingħand

Marius